|
Համայնքի ղեկավարը նշեց, որ 2023 թվականի նպատակային սուբվենցիոն ծրագրերի շրջանակում նախատեսված է Վարդենիս քաղաքի Վ. Համբարձումյան փողոցի ասֆալտապատման աշխատանքների իրականացումը։ 2023 թվականի օգոստոսի 1-ին, շինարարական աշխատանքների կազմակերպման նպատակով, «ԿԱՊԱՎՈՐ» ՍՊԸ-ի հետ կնքվել է պայմանագիր և համաձայնագիր։
Սակայն, որոշ ժամանակ անց, «ՎԵՈԼԻԱ ՋՈՒՐ» ՓԲԸ-ի դիմումի հիման վրա, ասֆալտապատման աշխատանքները դադարեցվել են՝ Վ. Համբարձումյան փողոցում ջրագծերի կառուցման աշխատանքների իրականացման անհրաժեշտությամբ։ Այժմ, երբ նշված աշխատանքներն ավարտվել են, շինարարական կազմակերպությունը կարող է վերսկսել ասֆալտապատման գործընթացը։
«ԿԱՊԱՎՈՐ» ՍՊԸ-ի մասնագետների կողմից իրականացված ուսումնասիրության արդյունքում պարզվել է, որ 2022 թվականին կազմված նախագծով նախատեսված շինարարական շերտերը՝ առկա ծածկի ֆրեզավորում, փոսային նորոգում, հարթեցնող շերտի տեղադրում (50%) և 5 սմ մանրահատիկ ասֆալտբետոն, չեն կարող կիրառվել տվյալ պահի իրական պայմաններում։
Մասնավորապես՝ ջրագծերի կառուցման հատվածներում գրունտը փափուկ է, իսկ մնացած հատվածներում՝ ֆրեզավորումից հետո հնարավոր չէ ապահովել փոսային նորոգման պատշաճ իրականացում։ Հաշվի առնելով վերոնշյալը՝ շինարարական կազմակերպությունն առաջարկել է վերանայել նախագծային լուծումները։
«ԿԱՊԱՎՈՐ» ՍՊԸ-ի գրությունը Վարդենիսի համայնքապետարանը փոխանցել է նախագծող «ԱՐՇԻՆ-ՔՈՆՍԹՐԱՔՇՆ» ՍՊԸ-ին, որը իրականացրել է անհրաժեշտ լրացուցիչ ուսումնասիրություններ և ներկայացրել մասնագիտական եզրակացություն։ Եզրակացության համաձայն՝ 2022 թվականին կազմված նախագիծը ներկա փուլում չի կարող իրագործվել, քանի որ այն չի համապատասխանում տարածքի ներկայիս տեխնիկական վիճակին։
Անհրաժեշտ է փոսային աշխատանքները վերացնելու նպատակով հայտարարել գնանշման հարցման մրցույթ՝ կատարելով վեր նշված աշխատանքները և թերությունները վերացնելուց հետո թույլ տալ «Կապավոր» ՍՊԸ-ին իրականացնել պայմանագրով նախատեսված ասֆալտապատման աշխատանքները։ Վ․ Համբարձումյան փողոցի շինարարական աշխատանքներն ավարտին հասցնելու համար առաջարկում եմ թույլ տալ 20․350․000/քսան միլիոն երեք հարյուր հիսուն հազար/ ՀՀ դրամի հատկացումը՝ համաձայն նախահաշվի։
Առարկություններ և առաջարկություններ չեղան:
18 կողմ, 0 դեմ, 0 ձեռնպահ ձայների հարաբերակցությամբ հարցն ընդունվեց:
|