|
Համայնքի ղեկավար Ահարոն Խաչատրյանը ներկայացրեց օրակարգի առաջին հարցը՝ նշելով, որ բյուջեի կատարողականի արդյունքներից փոքր-ինչ գոհ է: Նշեց, որ սեփական եկամուտները ինը ամսվա կտրվածքով անցած տարվա 56,8 տոկոս աճի համեմատ կատարվել է 105,5 տոկոս, և հույս հայտնեց, որ ամբողջ տարվա կատարողականը կկազմի հարյուր և ավել տոկոս։ Այնուհետև անդրադարձ կատարեց հարկային պարտավորություններին, ավագանու անդամներին խնդրելով, որ նրանք ևս մարեն իրենց հարկային պարտավորությունները, որպեսզի համայնքապետարանը դրա արդյունքում կարողանա ավարտին հասցնել սուբվենցիոն ծրագրերը և փակել իր այլ ծախսերը: Ինչ վերաբերվում է վարչական բյուջեին, համայնքի ղեկավարը նշեց, որ վարչական բյուջեն փաստացի կատարվել է 105,5 տոկոս, և հավելեց, որ հիմնական մասը կազմել է փոխադրամիջոցների գույքահարկը: Ծախսային մասով տոկոսային հարաբերությամբ կատարվել է 86,8 տոկոս: Ծախսերը հիմնականում ուղղվել են ընդհանուր պահպանման ծախսերի վրա՝ աշխատավարձ,կոմունալ ծախսեր, ՀՈԱԿ-ների պահպանման ծախսեր և աշնանացան ցորենի ծախսեր, իսկ ֆոնդային բյուջեի ծախսերը ուղղվել են սուբվենցիոն ծրագրերի իրականացման համար:
Այնուհետև խոսքը տրամադրվեց աշխատակազմի ֆինանսատնտեսագիտական եկամուտների հաշվառման և հավաքագրման բաժնի պետ Ս․ Գրիգորյանին, ով ներկայացրեց ծախսային և եկամտային մասը ըստ հոդվածների։
Հարցի վերաբերյալ ելույթ ունեցավ <<Քաղաքացիական պայմանագիր>> խմբակցության ղեկավար Նաիրա Մանուչարյանը, հարցնելով, թե ինչ հիմքեր կան, որ կատարողականը հաջորդ տարի պետք է դառնա 100 տոկոս, իսկ համայնքի ղեկավարը պատասխանեց, որ միայն քրտնաջան աշխատանքի արդյունքում։
Հարցը դրվեց քվեարկության՝ արդյունքում 14 կողմ, 0 դեմ, 10 ձեռնպահ ձայների հարաբերակցությամբ հարցն ընդունվեց։
Քվեարկությունից հետո և հաջորդ հարցը ընթերցելուց առաջ նիստերի դահլիճից դուրս եկավ ավագանու անդամ Սաթենիկ Մինասյանը և չմասնակցեց մնացած հարցերի քննարկմանը:
|